(រតនគិរី)៖ លោក កឹមរ័ត្ន វិសិដ្ឋ នាយករងខុទ្ទកាល័យសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា និងជាប្រធានក្រុមប្រឹក្សាភិបាលវេទិកាសម្ព័ន្ធសង្គមស៊ីវិល (វ.ស.ស.) និងលោក ងិន ណែល អភិបាលរង ខេត្តរតនគិរី បានអញ្ជើញជាគណៈអធិបតីក្នុងវេទិកាសន្ទនាជាមួយអង្គការសង្គមស៊ីវិលក្នុងខេត្តរតនគិរី ដែលរៀបចំឡើង វ.ស.ស. ក្រោមប្រធានបទ «កិច្ចសហប្រតិបត្តិការក្នុងភាពជាដៃគូ ដើម្បីពង្រឹងសមត្ថភាពអង្គការសង្គមស៊ីវិល ក្នុងបរិបទថ្មី» ដោយមានការចូលរួមពីតំណាងអង្គការ សមាគម សហគមន៍ និងសហជីព ព្រមទាំងមន្រ្តីជំនាញនៃរដ្ឋបាលខេត្តរតនគិរីជាច្រើនរូប។
ថ្លែងក្នុងអង្គវេទិកានាព្រឹកនេះ លោក កឹមរ័ត្ន វិសិដ្ឋ បានថ្លែងកោតសរសើរចំពោះកិច្ចសហការរបស់អង្គការសង្គមស៊ីវិលជាមួយអាជ្ញាធរមូលដ្ឋាន ក្នុងការលើកកម្ពស់ជីវភាព និងសុខុមាលភាពប្រជាពលរដ្ឋនៅក្នុងមូលដ្ឋានស្របតាម យុទ្ធសាស្រ្ត និងគោលនយោបាយអភិវឌ្ឍន៍ជាតិរបស់រាជរដ្ឋាភិបាល ក្រោមការដឹកនាំប្រកបដោយគតិបណ្ឌិតរបស់សម្តេចមហាបវរធិបតី ហ៊ុន ម៉ាណែត។
លោកបានលើកទឹកចិត្តឱ្យអង្គការសង្គមស៊ីវិលបន្ដអនុវត្តការងាររបស់ខ្លួនប្រកបវិជ្ជាជីវៈ និងទំនួលខុសត្រូវ ដោយត្រូវបន្តគោរពវិធានច្បាប់ជាធរមានដែលធានានូវគណនេយ្យភាព តម្លាភាព និងសុចរិតភាពព្រមទាំងជំនឿ ទុកចិត្តពីសំណាក់ម្ចាស់ជំនួយ និងសាធារណជន ព្រមទាំងបន្តសហការជាមួយអាជ្ញាធរមូលដ្ឋាន និងក្រសួង-ស្ថាប័នពាក់ព័ន្ធ។
ឆ្លៀតក្នុងឱកាសនោះ លោកក៏បានជំរុញឱ្យអង្គការសង្គមស៊ីវិលត្រូវតែបន្តពង្រឹងស្មារតីសាមគ្គីភាព ឯកភាពជាតិ និងបង្កើនស្មារតីស្នេហាជាតិ ដោយប្រកាន់ខ្ជាប់នូវទស្សនៈនិងផ្នត់គំនិតរួម ដើម្បីចូលរួមចំណែកជាមួយ រាជរដ្ឋាភិបាលក្នុងការលើកស្ទួយកិត្យានុភាពជាតិ និងឧត្តមប្រយោជន៍ជាតិ ជាពិសេស ការគាំទ្រនូវយន្ដការនានារបស់រាជរដ្ឋាភិបាលក្នុងការការពារបូរណភាពទឹកដី និងអធិបតេយ្យជាតិ ពីការឈ្លានពានដោយកំរោល របស់យោធាថៃ។
ជាមួយគ្នានេះ អភិបាលរងខេត្ត បានវាយតម្លៃខ្ពស់ចំពោះសមិទ្ធផលដែលអង្គការសង្គមស៊ីវិលសម្រេចបាននាពេលកន្លងមក ក្នុងវិស័យសំខាន់ៗ រួមមាន វិស័យសុខាភិបាល សង្គមកិច្ច អប់រំ សន្តិសុខស្បៀង យេនឌ័រ វប្បធម៌ សាសនា បរិស្ថាន និងការគ្រប់គ្រងធម្មជាតិ។ លោកក៏បានលើកទឹកចិត្តឱ្យអង្គការសង្គមស៊ីវិលបន្តសហការជាមួយអាជ្ញាធរក្នុងការអភិវឌ្ឍមូលដ្ឋាន ដើម្បីលើកកម្ពស់សុខុមាលភាព និងការរស់របស់ប្រជាពលរដ្ឋឱ្យបានកាន់តែល្អប្រសើរ។
ក្នុងឱកាសនេះ តំណាងអង្គការសង្គមស៊ីវិល បានបង្ហាញនូវការគាំទ្រយ៉ាងពេញទំហឹងចំពោះការដឹកនាំរបស់រាជរដ្ឋាភិបាល ក្នុងបុព្វហេតុការពារអធិបតេយ្យនិងបូរណភាពទឹកដី ក្រោមមគ្គុទ្ទេសក៍ដឹកនាំរបស់ សម្តេចតេជោ ហ៊ុន សែន ប្រធានព្រឹទ្ធសភានៃកម្ពុជា និងសម្តេចមហាបវរធិបតី ហ៊ុន ម៉ាណែត។
តំណាងអង្គការសង្គមស៊ីវិលដែលបានចូលរួម ក៏បានប្រកាសថ្កោលទោសយ៉ាងដាច់អហង្ការចំពោះឧក្រិដ្ឋកម្មសង្គ្រាម និងទង្វើឈ្លានពានមកលើអធិបតេយ្យនិងបូរណភាពទឹក ដីកម្ពុជាយ៉ាងគឃ្លើនពីសំណាក់កងទ័ពថៃ ដែលជាការបំពានលើធម្មនុញ្ញអង្គការសហប្រជាជាតិ ធម្មនុញ្ញអាស៊ាន និងច្បាប់អន្ដរជាតិពាក់ព័ន្ធនានា។
ជាចុងក្រោយ តំណាងអង្គការសង្គមស៊ីវិលខេត្តរតនគិរី ក៏បានអំពាវនាវដោយទទូចបណ្តាប្រទេសមហាអំណាចនិងសហគមន៍អន្តរជាតិ ក៏ដូចជាស្ថាប័នអន្តរជាតិនានាជំរុញឱ្យរដ្ឋាភិបាលថៃនិងយោធាថៃត្រូវគោរពអនុវត្តបទឈប់បាញ់ ដើម្បីធានាឱ្យបាននូវសន្តិភាពយូរអង្វែងនៅតំបន់ព្រំដែនកម្ពុជា-ថៃ ដែលជាការរួមចំណែកថែរក្សាសុខសន្តិភាព ស្ថិរភាព វឌ្ឍនភាព និងវិបុលភាពក្នុងតំបន់ និងត្រូវដោះលែងដោយឥតលក្ខខណ្ឌនូវវីរកងទ័ពកម្ពុជាទាំង ១៨រូប ដែលត្រូវបានកងទាហានថៃចាប់ខ្លួនដោយខុសច្បាប់ និងបានរំលោភបំពានលើបទឈប់បាញ់ កាលពីវេលាព្រឹកថ្ងៃទី២៩ ខែកក្កដា ឆ្នាំ២០២៥៕
No comments:
Post a Comment