លោក ដូណាល់ ត្រាំ ចាកចេញពីកិច្ចប្រជុំ G7 មុនមួយថ្ងៃ ដោយសារស្ថានការណ៍នៅមជ្ឈិមបូព៌ា

 លោក ដូណាល់ ត្រាំ ចាកចេញពីកិច្ចប្រជុំ G7 មុនមួយថ្ងៃ ដោយសារស្ថានការណ៍នៅមជ្ឈិមបូព៌ា

(KANANASKIS, កាណាដា)៖ ប្រធានាធិបតីអាមេរិក លោក ដូណាល់ ត្រាំ បានចាកចេញពីកិច្ចប្រជុំនៃក្រុមប្រទេស G7 ក្នុងប្រទេសកាណាដា មុនមួយថ្ងៃ ដោយសារតែស្ថានការណ៍ នៅក្នុងតំបន់មជ្ឈិមបូព៌ា។ នេះបើតាមសេតវិមាន ដកស្រង់ចេញផ្សាយដោយទីភ្នាក់ងារសារព័ត៌មាន Reuters។

អ្នកនាំពាក្យសេតវិមាន លោកស្រី Karoline Leavitt បានឱ្យដឹងក្នុងសារបង្ហោះលើបណ្ដាញទំនាក់ទំនងសង្គម X នៅថ្ងៃចន្ទ ទី១៦ ខែមិថុនា ថា «សម្រេចបានកិច្ចការជាច្រើន ប៉ុន្តែ ដោយសារតែស្ថានការណ៍កំពុងកើតឡើងក្នុងតំបន់មជ្ឈិមបូព៌ា លោកប្រធានាធិបតី ត្រាំ ត្រូវចាកចេញពីកិច្ចប្រជុំទាំងយប់បន្ទាប់ពីពិធីលាងសាយភោជន៍ជាមួយប្រមុខរដ្ឋនៃក្រុមប្រទេស G7»។ បណ្ដាមេដឹកនាំនៃក្រុមប្រទេស G7 ត្រូវជួបប្រជុំគ្នា ចាប់ពីថ្ងៃអាទិត្យ រហូតដល់ថ្ងៃអង្គារសប្ដាហ៍នេះ នៅក្នុងប្រទេសកាណាដា។

គួរបញ្ជាក់ថា មុនចាកចេញពីកាណាដា លោក ត្រាំ បានជំរុញឱ្យប្រជាជនទាំងអស់រស់នៅក្នុងរដ្ឋធានីតេហេរ៉ង់ ជម្លៀសខ្លួនចេញជាបន្ទាន់ ហើយបើតាមមន្ត្រីអាមេរិកម្នាក់ លោក ត្រាំ មិនបានចុះហត្ថលេខាលើសេចក្ដីព្រាងនៃសេចក្ដីថ្លែងការណ៍មួយអំពាវនាវឱ្យមានការបន្ធូរបន្ថយជម្លោះរវាងអ៉ីស្រាអែល និងអ៉ីរ៉ង់នោះទេ។ តែទោះជាបែបនេះក្ដី ប្រធានាធិបតីបារាំង លោក Emmanuel Macron បាននិយាយថាលោក ត្រាំ បានលើកឡើងនូវសំណើបទឈប់បាញ់មួយរវាងអ៉ីស្រាអែល និងអ៉ីរ៉ង់ ហើយថាការចាកចេញរបស់លោក ត្រាំ គឺជាសញ្ញាវិជ្ជមាន៕